دولة عرب نت

الكنترول

اذهب الى الأسفل

default الكنترول

مُساهمة من طرف shabanah2007 في الخميس أبريل 01, 2010 3:06 am

كنترول باص
من نكشات العبقري زيد أبو قراد
بقلم: صالح صلاح شبانة
Shabanah2007@yahoo.com

يا جماعة الخير ، السلام عليكم ورحمة الله وبركاته ،
هذا يا جماعة الخير أنا طول عمري وانا بتمنى أصير كنترول باص ، لأنه الكنترول حلم ، وهذي مهنه فيها (أكشن)، مثل أفلام هوليود ، والكنترول ببقى الزعيم القوي في الباص ، وطول عمري معجب فيه ، كيف بحفظ الطريق وكل خواصها ، فبتلاقيه يسأل الركاب : مين نازل على الدرج ، القهوه ، المطب ، المخبز الصبه خضرا ، المقبره ، الكراج ، البنشرجي ، الدايه ام حسين ، زقاق العميان ، زقة رودح ، ....الخ!!
وبتمرق من عند الدرج كون ما تلاقي درج ، شايلنه من عشرين سنه ،والقهوة بتلاقي محلها بياع جاج وريحة ها لنتافات لأبو موزه ، والمطب مشيول من عشر سنين وتلاقي محله دائره حكوميه مش قادره توخذ شهرته ، والمخبز بتلاقي محله مجمع تجاري ، والصبه خضرا نشفت من زمان وصارت امنقوره وحال الويل حالها ، والمقبره شالوها من عشرين سنه وعملوا محلها غرزة تحشيش ، والكراج صار وكالة سيارات ، والبنشرجي بنشر من زمان وصار محله صالون نسوان ، بتفوت الوحده بوجه عكر بسد النفس ، بتطلع جورجينا رزق ايام عرش الجمال ، والدايه ام حسين ماتت من عشرين سنه وعظامها صارن مكاحل ،وزقاق العميان صار دوار تعالوا وتفرجوا ، وزقة رودح صاير فيها مجمع اسكاني كل شققه سوبر ديلوكس ،...وهلم جرّا ...!!!
وبتسأل : ليش ما تتطوروا مع تغيير الأسماء ، وتجاروا الحديث ؟؟
كون يقولك : الناس ما عندهم استعداد للتغيير ..وهذا الأشي اللي مش قادره الحكومات تستوعبه لمّا تغير القديم بجديد،والناس بظاوا متعلقين بالقديم وصعب ذاكرتهم تلغي ها لحكي!!
وللكنترول فضل كبير في حفظ ها لذاكره ...!!
المهم شو النا بطول ها لسيره ، انا بدي أشتغل كنترول وبقيت أحلم في ها لمهنه من وانا ببو طفل ، بقيت بدي أطلع مع امي وأبوي الله يرحمهم من سنجل –لرام الله ، واستنينا لما مرق باص التميمي ، وركبنا اشي عَ الواقف واشي عَ القاعد وان غابت عنكم شوربه ...!!
وبقى واحد ينط من الباص قبل ما يوقف ويشعبط في الباص وهو ماشي ، وبلم مصاري من الناس ، وبتطلع في النسوان من غير ما حدا يزعل منه ، بالفعل شخصيه أسطوريه ما شفت من قبل مثلها ...!!!
ودارت الأيام ، ومرت الأيام على رأي زميلتي الحجه أم كلثوم ، وشفت ها لإعلان عن طلب كنتروليه لشركه كبيره جخه من حالاتها ، وقلت لحالي ولبالي جابها الله واجتك يا زيد أبو قراد ،واروح على حمام في سقف السيل واخلي ها لبلان يتآجر فيّ ، نقع وفرك ومَعِك ، لمّا طلعت ألِسطه ، واروح مشخص ولابس اللي على الحبل ، وحالق لحيتي وجهين ، وكأني رايح أخطب عروس ، ومش رايح اشتغل كنترول ...!!!
رحت لقيت أمة لا اله الا الله بدهم يشتغلوا ، ووجوه بتعوذ منها الشيطان بنفسه ...!!!
عاد أنا قعدت مؤدب وما شا لله حولي وحواليّ أستنا الدور...!!
ويييييييين ووين لما نادوا علي ، وانط مثل القرد ، نطه ولاَّ أنا قدام اللجنه ..!!
اللجنه بتطلعوا علي باستغراب ، وكأنهم مش شايفين سحنه أخت ها لسحنه ، وبعد ما اتأملوا طلتي البهيه ، سألوني اذا أنا في المحل الصح ، ولاَّ غلطان في العنوان ، فأكدت اني بدي أشتغل كنترول باص، ضحكوا وواحد قال : هو اشلحلي هالجاكيت وفك عن رقبتك الربطه ، وقبل ما أنفذ قاللي الثاني : واشلح القميص برضه ..!!!
أنا الصحيح انصدمت من ها لحكي واستغربت ها لسلوك ، بس نفذت وبيني وبين نفسي لو طلبوا مني طلب ثاني بقيت بدي أرفض ...!!
بس تفاجئت بالأسئله مثل رشق المطر :
-وين الوشم اللي عليك..؟؟ ، قلت : ما فيش!!
-وين ضربات الشفرات اللي على جسمك؟؟ ، قلت : مافيش
- وين الوسخ اللي تحت أظافرك ؟؟ برضه ما فيش
-بتعرف اتصفر للركاب ؟؟ لأ طبعا
-بتعرف اذا أعطاك الواحد دينار تتخصم بريزه اتدُّق الباقي عليه ..؟؟؟ ، طبعا لأ
-بتعرف تنط وتنزل في الباص وهو ماشي ؟؟؟ آآآحّسسسن ، طبعا لأ
ونزلت ها لأسئله وانا ما عندي غير لأ لأ لأ ..!!
وما شفتهم الا صرخوا مع بعض : والله لألائه اتلألئ قلبك ، روح غور من وجهنا ، ضيعت وقتنا عً الفاضي ، وطلعت أجرجر ذيال الخيبه ، وبعدها صرت كل ما أطلع في الباص أصير أراقب في الكنترول ، واعترف اني بقيت وهمان ، لأني لقيته واحد تبع مشاكل ، بلطجي تبع كاس وطاس ، بطلع الشر من طقاطيق الأرض ، وبدفع عليه عربون ، اسمه المخيف ، والمرعب ..!!
وعلى شان هيذ في دراسات يلغوا ها لمهنه المزعجه الكريهه ، الا انه وللأمانه في ناس دايرين على رزقة عيالهم ، والمطلوب تنقيتها من الشوائب ، رغم انها مثل برارة الخضره ، وقراقرة القطين ، بدك تكب منها أكثر بكثير من اللي ممكن تستفيد منه..!!
وخاطركم مع السلامه...،
تقرأ بلهجة أهل سنجل
http://www4.0zz0.com/2010/03/27/12/668939012.jpg
avatar
shabanah2007
عضو قيادي

ذكر
عدد الرسائل : 114
العمر : 64
المزاج : عالي والحمد لله
السٌّمعَة : 65
تاريخ التسجيل : 13/01/2009

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى